Immado ti apit dagiti 67 a mannalon ti Bacooc ken Laguiben, Lagangilang a nabenepisiaran iti techno-demo farm a programa ti Department of Agriculture ken gobierno probinsial.  

Agdagup iti 1,820 a sako ti irik ti naapit dagiti 40 a mannalon iti Bacooc ita a tawen kumpara iti 1,600 a sako idi 2018 manipud iti 20 nga ektaria a natalon basar iti record ti Municipal Agriculture Office ti Lagangilang.

1,232 a sako ti irik met ti naapit dagiti 27 a mannalon ti Laguiben kumpara iti 1,120 a sako idi 2018 manipud iti 14 nga ektaria a minulaanda.

Dagitoy a mannalon ti naikkan ti libre a bin-i, bogaso, ken pesticides tapno maipadas dagiti baro a teknolohia ken wagas iti panagtalon. Dagiti agricultural technicians met ti nangbayabay ken nangisuro kadagiti mannalon kadagiti kabaroanan a wagas iti panagtalon.

Segun kenni Benjamin Bayoan, presidente ti Bacooc Farmers Association, napintas ti nagbalin a resulta ti panagusarda iti Vitazyme, maysa nga organic crop bio-stimulant a mangpadakkel ti ramot dagiti mula. Daytoy ket mai-spray iti pagay kalpasan iti dua a lawas manipud pannakairaep.

RC 300 met ti bin-i nga inmulada, maysa a drought resistant rice variety ken saan a nalaka a madadael gapu kadagiti peste.

Naangay ti taripnong dagiti mannalon wenno “Field Day” iti panangidaulo ni Municipal Agriculture Officer Digna de Guzman sadiay Bacooc ken Laguiben idi Nobiembre 13 ken 15. Ditoy nga imbingayda ti napintaas a resulta ti techo–demo farm tapno agbalin a pagtuladan dagiti dadduma pay a mannalon a kayatda a dumakkel ti produktionda.