Maysa manen nga Abrenio ti dimmur-as gapu iti panagtalon. Manipud met iti Dolores ket ni Ceserina A. Aquitola, 66, naed ti Calumbaya a nakaadal iti natural a wagas ti panagtalon babaen kadagiti insayangkat ti OPAG a training seminar manipud idi 2017.

Iti agdama, aglaklako isunan ti organiko a bogaso a napataud manipud iti alinta wenno african night crawler. Kanayunanna pay dagiti organiko a produkto kas iti nateng, mais ken taraken a baboy, manok, ken pato.

Karaman kadagiti napundarna ti manarimaan a maipapa-accredit nga organic farming learning site. Daytoy ti innanaganna iti anakna a ni Cherry Palino nga isu ti mangitultuloy iti narugianna. Napagturposna pay ti maysa nga anakna a ni Caroline Jacildo a nagadal iti Animal Science.

Nupay maymaysa ni Aquitola a nangbiag iti pamiliana manipud pannakabalona idi 1982, saan a daytoy ti nakalapped iti panagasensona. Gaget ken regta ti nagbalin nga armasna ken ti panangsurotna iti naadalna a wagas ti panagtalon manipud OPAG.