Kas alternatibo a pagbiagan para kadagiti mannalon, ti Mushroom Production training seminar ket isaysayangkat ti Department of Agriculture-CAR Institutional Development Unit ken ti gobierno probinsial nga idadauloan ni Gov. Joy Bernos babaen iti Office of the Provincial Agriculture (OPAg).

Daytoy ket nakipartisiparan dagiti 25 a kameng ti farmers association iti San Quintin ken Tayum.

Inlawlawag ni Danica Tomin, DA Development Management Officer ti proseso iti oyster mushroom production ken dagiti benepisio iti salun-at nga ipaay daytoy.

Kinunana a ti mushroom wenno uong ket addaan iti bitamina ken mineral a kas iti calcium, iron, zinc, ken antioxidant.

Aktual met nga impakita ni Marites Balling, organic farming coordinator ti OPAg, ti proseso ti pannaka-produce ti oyster mushroom.

Dried mushroom, fresh mushroom, ken mushroom soup or noodles—dagitoy dagiti produkto a mabalin a mapartuat manipud iti mushroom production.

Bayat iti Padaya Trade Fair, ti fresh mushroom ket maysa kadagiti tagilako iti Abra Organic Practitioners Agriculture Cooperative (ABOPAC).

Adda metten dagiti farmers’ associations iti Peñarrubia, San Juan, Bangued, ken Manabo nga aglaklakon iti cultured mushroom iti luglugarda.

Ti fresh mushroom ket aggatad iti P180 kada kilo.