Maysa kadagiti naisigudan a pagbiagan dagiti agnaed iti Malaylay, Mudiit, Dolores ti panagdamili wenno pottery. Ngem iti panaglabas ti panawen, in-inoten daytoy a mapukpukaw.

Ni Nanang Fely Alunday-Kano, edad 70, ti maysa kadagiti nabatbati nga agdamdamili iti nasao a lugar. Napagbasada kenni Albert Kano a kapisi ti puso na dagiti walo nga annakda gapu iti panagdamili ken panagtalon. 

Iti agdama, makategged iti P1,600 tunggal lawas ni Nanang Fely manipud kadagiti dinamili a banga, paso, ken bricks a produktona a naaramid manipud iti pananglebbek, panaggamay, ken panagsukog iti daga wenno clay. Kinunana a saanen a kinayat dagiti simmaruno a henerasion nga adalen ti agdamili gapu ta saan dan a kayat ti agiggem iti daga. Ti kabsatna a ni Carlita Alfaro ken ipag na a ni Ludivina Tanura laengen ti kakadduana a makaammo nga agdamili.

Segun kenkuana, ti panagdamili ket kasapulanna ti panaggamay ken panagsukog iti naglaok a darat ken daga. Ti daga ket malebbek ken magasagas sakbay a masukog. Masapul a mailuto dagiti masukog a banga tapno saan a nalaka a mabittak. Daytoy a proseso ket maaramid iti uneg ti tallo nga aldaw.

Kinuna ni Nanang Fely a naimbitaran pay isuna sadiay Luba tapno agisuro no kasano ti agdamili gapu iti kinalagda dagiti produkto na. Daytoy ti nangted kenkuana ti ragsak ken namnama iti panagtultuloy ti tradision iti panagdamili ditoy Abra.