Iti agdama, (February 8, 2019) awan iti nakompirmaran a kaso iti kamuras (measles) ditoy probinsia ngem adda maysa a posible a kaso sadiay Brgy. Angad, Bangued, segun kenni Leila Bernal, Disease Surveillance Officer.

Kumpara idi Enero 2018 ken ita a bulan, awan iti nairecord a kaso ti kamuras iti PHO.

Kinuna ni Bernal a ti wagas tapno maliklikan iti pannakaiyakar iti sakit ket masapul nga appoten ti bibig nu aguyek ken nasayaat ken regular a panagbuggo wenno proper hand washing.

Ti kamuras ket nalaka a makaalis a sakit. Maiyakar daytoy babaen iti panagbaen, panaguyek, ken personal contact.

Dagiti paglasinan ken simtomas ket rashes wenno gagatel, panaguyek, panaglabbaga dagiti mata, ken nangato a agurigor. Makaited daytoy iti komplikasyon a mangapektar iti utek, nakaro a pneumonia nga agresulta iti nakaro a malnutrision, impeksion iti kudil, panagburis, dehydration, encephalitis, ken vitamin A deficiency a makaigapo iti pannakabulsek.

Inbaga ni Ma. Lourdes Briosos, National Immunization Program Coordinator a ti kasayaatan a panagprebentar iti kamuras ket babaen iti panagpabakuna. Kinunana a manipud panagsikog ket masapul a mapabakunaan ti ina iti tetanus diphtheria. Dagiti kaiyanak a maladaga kasapulan nga insigida a mabakunaan iti BCG ken Hepa B. Ti maikadua a dose ti Hepa B vaccine ket maited kadagiti ubbing nga 6-14 weeks old, Pentavalent, OPV, ken PCV ti maited kadagiti 6,10, ken 14 months old a maladaga, ken MMR kadagiti addaan maysa tawen ken tallo bulan nga ubbing.

Segun kenni Briosos, adu ti ubbing a nabakunaan ti PHO uray saan a nagun-od ti PHO ti 95% a target. Ti 95% ket saan a nagun-od gapu iti kinakurang iti health personnel, ken panagbaliw iti bilang ti populasion.

Idagdagadag ni Briosos kadagiti nagannak iti pannakabakuna dagiti ubbing iti Health Centers tapno maliklikan dagiti makaalis a saksakit. Daytoy a serbisio ket libre nga ipaay ti local health centers iti probinsia.

“Kadagiti nagannak ken agay-aywan kadagiti ubbing nga addaan iti ubbing a 9-59 months, igunamgunam mi kuma kadakayo a pabakunaanyo dagiti annakyo kadagiti ipapaay iti Department of Health ta dagitoy ket datin a programa ti Department of Health ken awan met ti makita tayo a pagdaksan na,” kinuna ni Briosos.

Inseguro ni Briosos a dagiti bakuna nga aggapu iti Department of Health ket napaneknekan a natalged iti salun-at isu nga dagiti nagannak ket masapul nga ipabakunada dagiti annakda tapno maprotektaran dagiti ubbing ken maprebentaran iti pannakaapektar iti kamuras.