BANGUED,ABRA- “Marikna ti tattao nga addan ti nagbal-baliwan nan ti Abra Provincial Hospital”

Pammasingked daytoy ni Governor Maria Jocelyn Valera-Bernos kalpasan a nagtugaw iti poder.

Ad-adda pay a napadur-as ti serbisyo ken pasilidad iti ospital tapnun masungbatan dagiti pagkasapulan  iti salun-at kas maysa kadagiti ipangrunana kas maibasar iti JOY HELPS Program.

In-inot pay iti pannakaipaay ti solusyon kadagiti problema dagiti pasyente pakaseknan iti panagkurkurang iti agas.

Kalikagum ti gobernador a maital-o pay ti estado ti 155 bed-capacity hospital manipod level 1 wenno general hospital ket maipangato iti level 2.

“We are trying to reach diay level 2, babaen iti rekomendasyon ti DOH, inikkan natayo ti namnama nga ag-level 2 ti ospital tayo” innayon ni Governor Bernos.

Tapnun magun-od daytoy, kasapulan ti pannakapadur-as ti serbisyo, physical plant, equipment/instrument ken personnel.

“Babaen iti level 2 hospital, maipasigurado ti nayun a bed-capacity maka-access kadagiti specialized services ken mapalawa pay ti masakupan ti Philhealth” kuna ni Atty. Russel Bragas, consultant iti APH.

Personnel ken Serbisyo iti Ospital

Napapigsa pay ti pwersa ti Abra Provincial Hospital a mangtaming kadagiti pasyente.

Nanayunan dagiti medical doctors nga immaboten ti tallo pulo, innem a dentist ken nanayunan pay ti bilang dagiti agpapaay a nurse.

Kuna pay ni Atty. Bragas, kalaksidan kadagiti datin a serbisyo iti ospital, addan ti diabetes center ken manamnama ti pannakalukat ti dialysis center.

Madama ti pannakai-demo ti fetal and maternal monitorkadagiti nurses, doctor ken ti consultant a ni Atty. Bragas a mausar a baro a serbisyo nga ipaay ti ospital

Mapadur-as ti Physical Plant

Masimsimpa ti flooring babaen iti pannakaipan ti tiles iti uneg ti Pediatric ward iti ospital.

Agtultuloy ti rehabilitation iti ospital gapu kadagiti nagabut a flooring, panagregreg ti bobeda ken dadduma pay a problema kadagiti kuarto.

Nasimpan ti flooring wenno nasukatanen ti tiles iti umuna a kadsaaran ken madaman a maitab-trabaho iti maikadua a kadsaaran.

Ti emergency room ket air-conditioned ken manayunan pay ti outlet ti centralized oxygen system.

“Manamnama masimpa dagiti dadduma pay a problema iti physical plant kas ti repainting, drainage system ken toy bobeda iti ospital”innayon ni Atty. Bragas.

Kabayatanna, nabukelen ti Housekeeping section iti ospital tapnun ad-adda a mabantayan ti kinadalus ti uneg ken ruar iti ospital.

Reactivation ti Therapeutic Committee

Pila dagiti bantay ti pasyente iti ospital bayat ti pannakisarita ni Atty. Bragas kenni Dr. Joel Beleno iti sango ti Pharmacy department iti ospital.

Tapnun masolusyunan ti problema iti panagkurkurang ti agas iti ospital, na-reactivate ti Therapeutic Committee a mangkita ti pagkasapulan ti agas.

Gagem daytoy a masolusyunan ti reklamo dagiti pasyente a kaawan ti agas iti ospital isu nga agdiretsoda iti ruar.

“Addan ti closed coordination dagiti doctors ken ti parmasya tapnun ammoda dagiti maireseta kadagiti pasyente” kuna ni Atty. Bragas, consultant iti APH.

Sungbat pay daytoyen iti reklamo pakaseknan kadagiti coded prescription wenno dagiti reseta a dagiti laeng doctor ti makaawat wenno adda iti naituding a parmasya a paggatangan iti masapul nga agas.

In-require mi, prescription should be readable ken very intensive ti drive a beforeda mapan gumatang iti ruar adda tatakna a not available”kuna pay ni Atty. Bragas.

Sumagmamano a medical doctors ken health staff ti naikkan ti warning gapu kadagiti reklamo kontra kadakuada mainiag iti daytoy.

“Siasinno man nga adda ti reklamo na kontra iti ospital, nawaya kayo nga agreklamo iti opisinak tapnun insigida a maaksyunan” ingibus ni Governor Bernos./ALL