Nangrugin nga agawat iti calamity loan applications ti Government Service Insurance System (GSIS) idi Nov. 3, 2016 kadagiti miembros a kayatna ti mangala iti nasao a serbisio.

Kabayatan ti regular schedule ti GSIS iti Abra Provincial Capitol idi Nov. 4, 2016, nailawlawag ti sistema iti panangala iti special emergency loan para kadagiti miembros a nadidigra ni Bagyo Lawin.

Kinuna ti GSIS, para kadagiti UMID card holders, mabalinda nga i-proseso ti loan a direkta kadagiti GSIS kiosks. Kadagiti met temporary card holders, nasken a mapanda iti kaasitgan a GSIS branch kas iti La Union ken Laoag. Kasapulanda laeng a mangitugot iti photocopies ti due a valid ID ken GSIS temporary ID nga back to back.

Mabalin met dagiti pensioners nga agaplikar iti one time availment iti balor a P20,000.00 ken saanda a mabalin ti ag-reloan agingga iti malpas a mabayadan daytoy.

Innayon pay ti GSIS nga um-umay iti Provincial Capitol a kabaelanda nga i-proseso ti enrolment ken loan applications a saanen a nasken a mapan kadagiti branches da iti ruar ti probinsia no la ket ta napigsa ti internet connection tapno mas kombiniente a maserbian dagiti GSIS members nga Abrenio.

Agingga inton December 2, 2016 ti panagawat ti GSIS iti calamity loan applications.