SIGLAT TI MANNALON NGA ABRENIO: Dua a nurse ti napagturpos ni Belen Blanco Blanza, 58, naed ti Angad, Bangued gapu iti gaget ken regtana iti panagtalon. Nupay maysa a single parent, saan a lapped daytoy iti panangisakadna kadagiti uppat nga annakna. Manipud iti kagudua nga ektaria, nakapundar ni Nanang Belen iti 3.2 ektaria a talon gapu iti panagtalon ken seed growing wenno panagpatanur ti de-kalidad a bin-i ti pagay wenno certified seeds iti tulong ti OPAG ken Department of Agriculture (DA).

Ti mapatanurna a bin-i ket gatgatangen ti PhilRice iti nanginngina a presio kumpara iti normal a pagay. Kanayunanna, dakkel pay ti naitulong ti organic farming gapu ta bimmassit ti gastosna iti panagtalon a saanen a kasapulan a gumatang iti komersial a bogaso.

Nakaipatakder payen ni Nanang Belen iti learning site a manarimaan itan ti pannakaiproseso ti accreditationna iti DA. Kinunana a kayatna met nga isuro kadagiti padana a mannalon maipanggep ti organic farming gapu ta nasayaat daytoy iti salun-at ken iti aglawlaw. Kasta met ti panagpatanur ti napintas a bin-i tapno umadu ti apit dagiti padana a mannalon.