Kiling- kiling wenno dirty ice cream ti awag dagiti taga Abra iti nakakariton nga idurduron ni Imelda Besinal Batalon, 48 anyos a taga Linasin, Bangued, sadiay tiendaan.

Ti ice cream a naaramid ditoy Abra ket paborito dagiti Abreño kas merienda wenno handa ti panagkasangayda ken dadduma pay nga okasion.

Nasurok tallo a dekadan nga aglaklako ni Batalon ti ice cream ditoy Abra. Balasang pay laeng isuna idi inrugina ti nasao a negosio. Segun kenkuana, tinawidna ti kaammoanna nga agaramid ti nasao a taraon kadagiti nagannak kenkuana.

Agingga a nakiasawa kenni Domingo Batalon, intultuloyda ti nasao a negosio agingga iti agdama. Manual ti panagaramidda iti ice cream gapu ta awan ti mixer machine nga aramatenda. Anusanda a kiwaren dagiti napaglalaok a napudot a danum, arena, gitta ti niyog, gatas, asukar, ken dadduma pay. Kalpasan a mapaglalaok dagitoy, maikabil ti mixture iti uneg ti lata ken maikkan ti nagadgad a yelo ken asin ti ruarna a mangpatangken ken mamagbalin nga ice cream. Ti dua a tube nga ice cream ket agbalor ti P3,500. P20.00 ti tinapay nga adda palamanna nga ice cream ken adda sag P20.00 a nakakabil iti apa. Adda met agbalor ti P10.00 ken P5.00 para kadagiti basbassit ti budgetna.

Ni Batalon ti nakatoka nga agpuesto iti uneg ti merkado publiko ti Bangued ket ti met asawa na ti agpasyar iti naduma-duma a paset ti ili. Daytoy ti negosioda nga agassawa nga isu ti pangal-alaanda ti inaldaw a pagbiag ken pagpaadal ti annakda. Segun kenkuana, saan a tubeng ti kinarigat ti biag tapno mapaadalna dagiti pito nga annakda. Kinunana a kasapulan laeng ti gaget ken determinasion tapno maisakad a nalinteg ti panagbiagda a sangkapamilia. Iti uneg ti sumagmamanon a tawenda iti nasao a negosio, napaturposdan nga agassawa dagiti dua nga inunaan nga annakda iti kurso a Bachelor in Computer Science ken Bachelor in Secondary Education. Agpadan nga agtrabtrabaho dagiti dua nga annakda nga isu ti mangtultulong kadakuada iti agdama.