“Makapabang-ar ti rikna a makasalbarka iti biag,” daytoy ti kinuna ni San Isidro nurse Reynalyn Tadeo. Ni Reynalyn ket maysa kadagiti Human Resource for Health (HRH) a nagidonar ti dara iti napasamak a bloodletting program nga insayangkat ti Department of Health (DOH) ken Red Cross Abra Chapter idi Nobiembre 28, 2019.

Agdagup iti 123 bags a dara ti nakolekta manipud iti nasao a bloodletting program. Ad-ado nga amang kompara iti 70 bags idi napan a tawen.

Ti  programa ket paset iti tinawen a programa ti DOH tapno makaited iti naan-anay a supply ti dara ditoy probinsia. Dagiti HRH ken midwives ti kada munisipio manipud iti naduma-duma a paset ti Abra ti nagidonar iti dara.

Segun kenni DOH team leader Dr. Alex Bayubay, no saan a makaidonar ti mismo nga empleado ket kasapulan nga adda alaenna a mangisaop kenkuana. 

Dagiti nakolekta a dara ket maited iti Abra Provincial Hospital ken Red Cross Abra Chapter tapno adda nadadaan a mausar dagiti agkasapulan a pasiente.