Kayat ti Provincial Government of Abra a mairaman ti sibubukel nga Abra iti coverage ti Cash Relief (CARE) Program ti Overseas Workers Welfare Administration.

Panggep ti CARE a mangted iti cash relief kadagiti OWWA workers ken pamilyada a naapektaran iti isasaplit ni Bagyo Lawin idi October 19, 2016.

Iti Memorandum of Instruction No. 13 manipud iti OWWA, maikkan iti one-time cash relief assistance kadagiti OWWA members kadagiti luglugar a naikabil iti babaen ti Tropical Cyclone Warning Signal No. 5 babaen iti National Disaster Risk Reduction and Management Council (NDRRMC).

Karaman kadagitoy dagiti probinsia ti Cagayan, Isabela, Kalinga, Apayao, Ilocos Norte ken Northern Abra.

Maikkan iti cash assistance a P3,000.00 kada active OWWA member ken P1,500.oo met kadagiti non-active members.

Naipaganetget iti memo a dagiti laeng OWWA members nga agnanaed kadagiti lugar a naideklarar iti TCWS No. 5 ti maikkan iti cash assistance.

Gagem ni Gov. Maria Jocelyn Valera Bernos nga amin nga OWWA members ditoy Abra ket mairaman iti coverage ti CARE program gapuenta saan laeng met nga iti akin-amianan a paset ti probinsia ti nakaro a nadidigra kenni Super Typhoon Lawin.

Immuna iti daytoy, kinuna ni OIC Regional Director Evelyn C. Laranang ti OWWA CAR a ti memo of instruction ket naggapu iti OWWA council ken isu ti surotenda.

Gaput iti daytoy, nagsurat ti PGA babaen keni Gov. Bernos kenni Administrator Hans Leo K. Cacdac tapno kiddawenna a mairaman dagiti amin nga OWWA members ditoy Abra iti CARE program ti ahensia.

Iti biang ti OFW Center iti babaen ti PGA, agtultuloy ti panangawatda iti aplikasion manipud kadagiti OWWA members a qualified para iti nasao a benefisio.